இலங்கை

ஜனாதிபதி கோத்தபாய ராஜபக்ஷ மற்றும் சீன ஜனாதிபதி ஜி ஜின்பிங் ஆகியோர் நேற்று (29) மாலை ஒரு தொலைபேசி உரையாடலை நடத்தியுள்ளனர்.

இதன்போது அனைத்து துறைகளிலும் பரஸ்பர நன்மை பயக்கும் இருதரப்பு ஒத்துழைப்பை வலுப்படுத்தவும் மேம்படுத்தவும் ஒப்புக் கொண்டதாக ஜனாதிபதியின் ஊடக பிரிவு தெரிவித்துள்ளது.

இலங்கையின் நிலையான அபிவிருத்திக்கு தாம் தொடர்ந்து ஆதரவளிப்பதாகவும், பலதரப்பு அரங்கில் எதிர்கொள்ளும் அழுத்தங்களுக்கு முகங்கொடுக்கும் வகையில் இலங்கைக்கு உறுதுணையாக நிற்பதாகவும் சீன ஜனாதிபதி இதன்போது வாக்குறுதியளித்துள்ளார்.

இதேவேளை ஐ.நா மனித உரிமைகள் பேரவையில் சமீபத்தில் முடிவடைந்த 46 ஆவது அமர்வில் இலங்கைக்கு சிறப்பான ஆதரவளித்ததற்காக ஜனாதிபதி ஜி ஜின்பிங் மற்றும் சீன அரசாங்கத்திற்கு தனது மனமார்ந்த நன்றியைத் தெரிவித்தார். 

அதேநேரம் 600,000 சீன கொவிட் தடுப்பூசி டோஸ்களை வழங்கியமைக்காவும் நன்றி தெரிவித்தார்.

சிங்கள மற்றும் தமிழ் புத்தாண்டு வாழ்த்துக்களைத் தெரிவித்த உரையாடலில் இணைந்த சீனத் தலைவர், கொவிட் -19 தொற்றுநோய் ஒரு சக்திவாய்ந்த சவாலாக இருந்தது, இது சீனா-இலங்கை உறவுகளை புதிய நிலைக்கு உயர்த்த உதவியது என்று கூறினார்.

இலங்கை ஜனாதிபதியுடனான தொலைபேசி அழைப்பின் போது, ஜனாதிபதி ஜி ஜின்பிங், இலங்கைக்கு சீனா தொடர்ந்து தேவையான உதவிகளை வழங்கும், விமான போக்குவரத்து மற்றும் கல்வி உள்ளிட்ட பகுதிகளில் ஒத்துழைப்பை நடத்துகிறது மற்றும் பிற ஒத்துழைப்பு பகுதிகளை ஆராயும் என்றும் கூறியுள்ளார்.

மேலும் பட்டுச் சாலை ஒத்துழைப்பை மேம்படுத்துவதற்கும், தொற்றுநோய்க்கு பிந்தைய காலத்தில் இலங்கையின் பொருளாதார மறுமலர்ச்சிக்கு பங்களிப்பதற்கும் சீனா இலங்கையுடன் இணைந்து பணியாற்ற தயாராக இருப்பதாக ஜனாதிபதி ஜி ஜின்பிங் குறிப்பிட்டுள்ளார்.

ஹம்பாந்தோட்டை துறைமுகம் மற்றும் பிற உள்கட்டமைப்பு மேம்பாட்டுத் திட்டங்கள் திருப்திகரமாக முன்னேறி வருவதாகக் குறிப்பிட்டுள்ள ஜனாதிபதி கோத்தபாய ராஜபக்ஷ, இந்தத் திட்டத்தின் மீதமுள்ள பணிகளை விரைவாக முடிக்குமாறு சீன அரசிடம் கேட்டுக்கொண்டார்.

ஜனாதிபதி கோத்தபாய ராஜபக்ஷ தனது பதவிக் காலத்தின் மீதமுள்ள நான்கு ஆண்டுகளில் இலங்கையின் செழிப்புக்கும் வளர்ச்சிக்கும் தேவையானதைச் செய்ய விரும்புவதாகக் கூறினார். 

“வறுமை ஒழிப்பு எங்கள் முதன்மை நோக்கம். அதற்காக, சீனாவின் முன்மாதிரியை நாம் பின்பற்றலாம் ”என்றார்.

கடந்த சில ஆண்டுகளில், தனது நாட்டில் 9 மில்லியன் மக்கள் வறுமையிலிருந்து உயர்த்தப்பட்டதாக தெரிவித்த சீனத் தலைவர் இலங்கையில் வறுமையை ஒழிக்க உதவ விருப்பம் தெரிவித்தார்.

ஐ.நாவில் சீனாவின் சட்டபூர்வமான இடத்தை மீட்டெடுப்பதற்கு இலங்கை அளித்த ஆதரவை சீனா ஒருபோதும் மறக்காது என்றும், பரஸ்பர அக்கறை தொடர்பான பிரச்சினைகளில் ஒருவருக்கொருவர் ஆதரவளிப்பதற்கும், ஒருவருக்கொருவர் நியாயமான உரிமைகளைப் பாதுகாப்பதற்கும், உலகளாவிய நீதியை ஊக்குவிப்பதற்கும், இலங்கையுடன் தொடர்ந்து பணியாற்றத் தயாராக இருப்பதாகவும் ஜனாதிபதி ஜி கூறினார். 

2014 இல் இலங்கைக்கு விஜயம் செய்ததை நினைவு கூர்ந்த ஜி ஜின்பிங், ஜனாதிபதி கோத்தபாய ராஜபக்ஷ சீனாவுக்கு விரைவில் விஜயம் மேற்கொள்ள வேண்டும் என்றும் வலியுறுத்தினார்.

இலங்கை மத்திய வங்கிக்கு சீன மக்கள் வங்கி வழங்கிய நாணய இடமாற்று வசதியை ஜனாதிபதி கோத்தபாய ராஜபக்ஷ பாராட்டியதோடு, இது நிச்சயமாக இலங்கையின் நிதி ஸ்திரத்தன்மையை உறுதிப்படுத்த உதவும் என்றும் கூறினார்.

இலங்கை-சீனா நட்பின் அடையாளமாக ஹம்பாந்தோட்டையில் ஒரு தொழில்நுட்ப பல்கலைக்கழகம் நிறுவப்படுவதற்கு சீனாவின் தொடர்ச்சியான ஆதரவை நாடிய ஜனாதிபதி கோத்தபாய ராஜபக்ஷ, சீன கம்யூனிஸ்ட் கட்சியின் 100 ஆவது ஸ்தாபக ஆண்டு விழாவிற்கு சீனாவை வாழ்த்தினார்.