சமையல்

 மீன் வகைகளிலேயே இறால் மீன் என்றால் பலருக்கும் அதீத பிரியம் உண்டு. வார விடுமுறை நாட்களில் இறால் தொக்கு சமைத்து சாப்பிடலாம்.

ஆனால், அந்த இறால் மீனை பக்குவமாய் செய்யாவிட்டால், அதன் சுவை மாறுவது மட்டுமின்றி ரப்பர் போல ஆகிவிடுமாம்.

தேவையான பொருட்கள்

இறால் சுத்தம் செய்து குடல் நீக்கியது - 250 கிராம், பெரிய வெங்காயம் - 100 கிராம், தக்காளி - 100 கிராம், இஞ்சி-பூண்டு விழுது - ஒன்றரை டீஸ்பூன், மஞ்சள்தூள் - கால் டீஸ்பூன், மிளகாய்த்தூள் - ஒரு டீஸ்பூன், சோம்பு - அரை டீஸ்பூன், பச்சை மிளகாய் – 2, கறிவேப்பிலை – சிறிதளவு, நறுக்கிய கொத்தமல்லித்தழை – சிறிதளவு, கரம் மசாலாத்தூள் - ஒரு டீஸ்பூன், எண்ணெய் - 3 டேபிள்ஸ்பூன், உப்பு - தேவையான அளவு.செய்முறை விளக்கம்

முதலில், பெரிய வெங்காயம், தக்காளி, பச்சை மிளகாயை தனித்தனியாக பொடியாக நறுக்கிக்கொள்ளவும். அடுப்பில் வாணலி வைத்து எண்ணெய் சேர்த்துச் சூடானதும், சோம்பு சேர்க்கவும். சோம்பு நன்றாக பொரிந்ததும் நறுக்கிய பெரிய வெங்காயம் சேர்த்து நன்கு வதக்கவும்.

இதன் பின்பு இஞ்சி-பூண்டு விழுது, பச்சை மிளகாய் சேர்த்து பச்சை வாசனை நீங்கும்வரை வதக்கவும். கறிவேப்பிலை, மஞ்சள்தூள், மிளகாய்த்தூள் சேர்த்து நன்கு கிளறவும். பின் தக்காளியைச் சேர்த்து நன்றாக வதக்கவும்.

தேவையான அளவு உப்பு, தேவைப்பட்டால் சிறிது தண்ணீர் சேர்த்து மசாலாவை நன்கு வதக்கி, அதனுடன் சுத்தம் செய்த இறாலைச் சேர்த்துக் கிளறி வேகவிடவும். மேலும், சிறிது நேரத்தில் இறால் வெந்ததும் கரம் மசாலாத்தூள் மற்றும் நறுக்கிய கொத்துமல்லித்தழை சேர்த்து நன்றாகக் கிளறிய பின் இறக்கவும்.

குறிப்பு

இறால் தொக்கு செய்யும் போது, தக்காளி வெங்காயம், மசாலா பொருட்களை சேர்த்து வதக்கி வைத்துக்கொண்டு, இறாலை 10 முதல் 12 நிமிடம் வரை மட்டுமே வேக வைக்க வேண்டும். அப்படி வேக வைத்தால், மட்டுமே இறால் மென்மையாகவும், சுவையாகவும் இருக்குமாம். இல்லையென்றால் ரப்பர் போல மாறிவிடுமாம்.